مــجــانــيــن

الغلاف

2005-02-06T23:55:00.006+11:00

استمعوا إلى قصائد هذا الديوان بصوت شربل بعيني

Charbel Baini
Majanin
Maniacs
أوّل كتاب باللغة العربية يطبع في أستراليا
**

اقلب الصفحة من فضلك

دياب الشعب

2005-02-06T01:35:00.002+11:00

إيمان
بؤمِنْ بِأَللَّـه.. وْعَيْبْ أَكِّدْ هَـ الإِيمَانْ
بؤمِنْ بِعِيسَى وْبِالرَّسُول كْمَانْ
بؤمِنْ بِإِنْجِيلِي وْبِالْقُرْآنْ
بؤمِنْ بِوِحْدِةْ شَعْبْ
عَاش بْرِضَى وِبْحُبّْ
عَ أَرْض لُبْنَانْ
**
دياب الشّعب
ـ1ـ
محْتَارْ كِيف بْبَلِّشْ الأَشْعَارْ
وِالْحرْفْ عَمْ بِيئِنّ بِكْتَابِي
مِنْ ظُلْمْ نَاس مْوَلّعِينْ النَّارْ
وْتَا يِدْبَحُونَا أَلّفُوا عْصَابِه
لَكِنْ كَرَامِةْ طُفل أَوْ خِتْيَارْ
عَمْ يِلْعَبُوا فِيهُنْ مِتِلْ طَابِه
وْكِرْمَالْ يِبْقَى الْجَارْ حَدّ الْجَارْ
بَدِّي بْيُوت الشِّعر فَجِّرْهَا
وْخَلِّص مِنِ الْوَيْلات أَحْبَابِي
ـ2ـ
كْرَامِةْ شَعب إِيدَيْهْ مَفْتُوحَه
وْعَ فْعَالْ الْخَيْرْ مِعْتَادِه
كْرَامِةْ وَطَنْ عِمْلُوه مَرْجُوحَه
وْرِكْبُوا عَ ضَهْرُو.. وْطَوّلُوا زْيَادِه
كْرَامِة الأَرْزِه التَّاكْيِه شْلُوحَا
أمّنَا.. اللِّي مْنِعْبِدَا عْبَادِه
دْيَاب الشَّعبْ رَحْ تِنْزِهِق رُوحَا
وْنِتِّفِقْ إِسْلامْ وِنْصَارَى
وْبِالْجَوّ نِرْفَعْ رَايِة بْلادِي
ـ3ـ
يَا نَاسْ، وَاللَّـه، طَوّلِتْ هَـ الْحَرْبْ
الْـ شَرّدِتْنَا بْأَلْف دَرْبْ وْدَرْبْ
سْقِينَا الدِّنِي مْنِ دْمُوع عِينَيْنَا
وْبِالْوَقْتْ ذَاتُو النَّارْ جُوَّا الْقَلْبْ
وْمَا عَادْ فِي مْطَارِحْ بِـ إِيدَيْنَا
اهْتَرْيِتْ إِيدَيْنَا مْنِ مْسَامِيرْ الصَّلْبْ
يَا رَبّ خَلِّي عَيْنَك عْلَيْنَا
نِحْنَا الْـ زَرَعْنَا فَوْقْ بِالْعَالِي
الأَرْز اللِّي إِسْمُو الْيَوْم.. أَرْز الرَّبّْ
ـ4ـ
رْجَالْنَا ضَحُّوا تَا تِتْسَمَّعْ
هَـ الأَرْضْ.. شُو مَكْتُوبْ بِكْتَابُنْ:
" هَوْدِي بَشَرْ نَارُنْ عَم بْتِلْمَعْ
وْمَا فِي حَدَا دَنَّسْ حِمَى غابُنْ
هَوْدِي اللِّي قَلْبْ الأَرْزْ عَمْ يُوجَعْ
مِنْ يَوْمْ مَا مِضْيُوا عَلَى غْيَابُنْ
هَوْدِي الْـ بَلا عِزُّنْ صَعبْ يِرْجَعْ
عِزّ الدِّنِي الْمَزْرُوعْ بِتْرَابُنْ
هَوْدِي الْـ بِـصَدْرُنْ حَارَبُوا الْمَدْفَعْ
وْتَا يْضَلّ قِطْعَه مْنِ السَّمَا لُبْنَانْ
رِضْيُوا يْضَحُّوا بْخِيرِة شْبَابُنْ"
ـ5ـ
التَّارِيخْ خَبَّرْ كِيفْ صيَّرْنَا الدِّنِي
جَنِّةْ نَعِيم مْزَيّنِه بْأَفْكَارْهَا
وْصَارِتْ شُعُوبْ الأَرْضْ كِلاَّ تِنْحِنِي
قدَّامْ حُرِّيِّه.. وْمَجدْ أَحْرَارْهَا
وِاللِّي انْظَلَمْ بِبْلادْ فِيهَا شَيْطَنِه
وْمَا عَادْ مَيَّزْ لَيْلهَا مْنِ نْهَارْهَا
بْيِلْتِجِي لِلُبْنَانْ.. لِلْعَيْش الْهَنِي
بِبْلادْ دَاخْ الشِّعر مِنْ شِعَّارْهَا
شُو صَابْنَا؟!!.. حَتَّى الرَّوَائِحْ مِنْتِنِه
وِالْجَمَاجِمْ شَوَّهتْ أَزْهَارْهَا
وْمُطْلَقْ زَعِيمْ بْفَرْدْ كِلْمِه مِفْتِنِه
بْيِزْرَعْ بَلَدْنَا جُوع وِجْنُون وْدِمَا
وْبِيصِيرْ يِتْدَفَّى عَ لهْبِةْ نَارْهَا؟!
ـ6ـ
وَيْنْ صِرْنَا؟!..وْلَيْشْ بَلْعِتْنَا الدُّرُوبْ
وِغْبَارْهَا مَحَّى أَسَامِينَا؟!
وْكِلّ عُمْرَا الشَّمْسْ سَاعَات الْغُرُوبْ
تِتْحَمَّم بْمَيِّةْ سَوَاقِينَا
وِتْشِعّْ ضِحْكِتْهَا.. إِذَا مْنِضْحَك.. شْعُوبْ
وِتْغِصّ بِالدَّمْعَه.. لَوِ بْكِينَا
حْرَامْ الدُّولاب يْدُورْ بِالْمَقْلُوبْ
وْخِتْيَارْنَا يِنْطُرْ عَلَى الْمِينَا
كِرْمَالْ عَيْنْ الثَّعْلَب الْمَغْضُوبْ
الْعَامِلْ نَاطُور الأَرْضْ وِالْكَرْمَاتْ
وْبِالسِّرّ عَمْ يِسْرُقْ دَوَالِينَا!!
ـ7ـ
قَسّمُونَا شْوَارِع وْسَاحَاتْ
وْرِمْيُوا الْبُغُضْ بِقْلُوبْنَا الْحلْوِه
اسْتِقْلالْنَا، الْـ مَا لِحِقْ يِخْلَقْ.. مَاتْ
صَلْبُوه فَوْق حْنَاكُنْ الرَّخْوِه
وْصَفَّى التَّعَايُشْ كَوْمِة نْفَايَاتْ
لِمِّنْ سَفَكْنَا دَمّنَا بْنَشْوِه
وْصَارِت عْلَيْنَا تِمْرُقْ السَّاعَاتْ
وِعْقَارِبَا مْنِ الْقَهْر عَمْ تِلْوِي
وْنِحْنَا عَمِ نْوَدِّعْ هَنَا الْغَفْوَاتْ
وْأَحْلامْ مَاتِتْ غَدْر بِالْغَفْوِه
كِرْمَالْ تِفْنِي بَعضْهَا زْعَامَاتْ
الشَّعْبْ عِنْدَا.. سْلالِـم وْدَرْجَاتْ
وِالدِّينْ أَقْرَبْ دَرْب.. لِلثَّرْوِه
ـ8ـ
بْلادْنَا.. أَللَّـه خَلَقْهَا مْغَيَّرَه
عَنْ غَيْرهَا.. وْقَلاَّ: أَنَا رَحْ إِدْعَمِكْ
وْرَحْ حَوّلِكْ لِلطَّائِفِيِّه مَقْبَرَه
وْتِرْجمِي عَ طُولْ هَللِّي بْيِرْجمِكْ
أَرْزِي أَنَا.. لِلْكَوْن كِلُّو مَفْخَرَه
وْضِحْكِة شْفَافِي مْصَوّرَه عَ مَبْسَمِكْ
شَعْبِكْ.. مَا بَدِّي يَوْمْ يِحْمِلْ مَبْخَرَه
وِيْبَخِّر لْحُكَّامْ غِشّ بْتِحْكِمِكْ
هَيْدِي زَعَامِه قْلُوبْهَا مِتْحَجّرَه
بْتِرْكَع تْصَلِّي كِذب سَاعات النَّهَارْ
وْمِنْ دُونْ شَفْقَه بْلَيْلهَا عَمْ تِعْدِمِكْ!!
ـ9ـ
تَا نِحِسْبَكْ شِي يَوْم زِقَّفْت لْزَعِيمْ
لازِمْ بِسِرْعَه تْقِصّ صَابِيعَكْ
وِتْصِيحْ بِالْعَالِي: اغْفِرْلِي يَا رَحِيمْ
وْتِحْنِي الرَّقْبِه وْتِسْكُب دْمُوعَكْ
هُوِّي اللِّي خَلاَّ بْلادْنَا تْعِيش بْجَحِيمْ
وْهُوِّي الْـ حَرَقْ عَ مَدْبَحُو شْمُوعَكْ
وْهُوِّي الْـ هَدَمْ عَنْ قَصْد جَنَّاتْ النَّعِيمْ
وْهُوِّي الْـ سَرَقْ تَا تْمُوتْ مِنْ جُوعَكْ
وْهُوِّي اللِّي مِنُّو خَافْ شَيْطَانْ الرَّجِيمْ
وَقْت الْـ قَتَلْ إِمَّاتْنَا وْبَيَّاتْنَا
وْمَنْعَكْ يَا خَيِّي تْحَقِّقْ رْجُوعَكْ
ـ10ـ
حَلَّكْ بَقَى تِفْهَمْ شُو عَمْ قِلَّكْ:
بْلادَكْ اخْتَرْبِتْ مِنْ زَعَامِتْهَا
الْـ عِرْفِتْ يَا خَيِّي كِيفْ تِتْمَلَّكْ
بْخَيْرَاتْهَا.. وْكَفَّا عَ رَقْبِتْهَا
وْقِدّامْ عَيْنَا الشَّعْبْ عَمْ يِهْلَكْ
وْلِلْغَيْرْ عَمْ بِتْبِيعْ غَلِّتْهَا
شُوف الأَسَى الْخِلْقَانْ مَعْ طِفْلَكْ
وِسْمَاعْ كِيفْ بِتْرِنّ ضِحْكِتْهَا
فِيقْ دَخْلَكْ فِيقْ مِنْ جهْلَكْ
وْهَاتْ إِيدَكْ حِطّهَا بْإِيدِي
مِنْشَانْ نِطْفِي نَارْ فِتْنِتْهَا
ـ11ـ
هَاتْ إِيدَكْ هَاتْ.. يَا خَيِّي
بْإِيدَك وْإِيدِي السِّحرْ مِتْخَبَّى
تْنَيْنَاتْنَا بْقُوِّه إِلَهِيِّه
مْنِقْضِي عَ زِمْرَه مْضَيّعَه رَبَّا
كِذْبِت عْلَيْنَا بْأَلْف خَبْرِيِّه
وْرَضّعِتْنَا سْمُومْ مِنْ عبَّا
سْمُومْهَا، نَعْرَاتْ دِينِيِّه
وِزْهُورْ سَوْدَا مْزَيّنِه دَرْبَا
عَجِّلْ بَقَى تَا نِحْمِلا سْوِيِّه
وِبْبَحرْ مَا لُو آخِر نْكِبَّا
إِنْت وْأَنَا.. يَا نُورْ عِينَيِّي
لازِم نْحَارِبْ هَـ الزَّعَامِه كْتِيرْ
وِنْشِكّ سَيْف حْقُوقْنَا بْقَلْبَا
ـ12ـ
إِنْت وْأَنَا.. الْـ مِنْخَلِّصْ الأَجْيَالْ
مِنْ ظُلْم شَتَّتْنَا بِـ هَـ الْغُرْبِه
وِالْهَمّ فَوْق صْدُورْنَا أَحْمَالْ
وِالنَّارْ تَاكُلْ قَلْبَكْ وْقَلْبِي
إِنْت وْأَنَا.. لِبْلادْنَا رِسْمَالْ
وِكْنُوزْنَا حَبَّات هَـ التّرْبِه
الْـ مَا بْتِنْشَرَى يَا صَاحْبِي بِالْمَالْ
وْلا بْتِنْهَدَى بِمْغَلَّف وْعِلْبِه
وْلا يَوْمْ رِضْيِتْ يِنْقبر دجَّالْ
جُوَّاتْهَا.. وْلا اسْتَقْبَلِتْ كِذْبِه
يَلْلاَّ سَوَا تَا نْحَقِّقْ الآمَالْ
وْنِمْسَحْ غَشَاوِةْ حِقْدُن الْمَلْعُونْ
وْنِفْلَح وْنِزْرَعْ أَرْضنَا.. مْحَبِّه
ـ13ـ
عَارِفْ أَنَا.. عَمْ إِكْتُب بْشِعْرِي
نْهَايْتِي.. وِنْهَايْتِي اسْتِشْهَادْ
وْعَمْ إِسْرُق الأَيَّامْ مِنْ عُمْرِي
وْأَيَّامْ عُمْرِي كلّهَا أَمْجَادْ
مَا هَمّنِي لَوْ يِطْعَنُوا صَدْرِي
وْمَا هَمّنِي لَوْ صَارْ جِسْمِي رْمَادْ
الْـ بِيهِمّنِي.. مَا يِنْفتحْ قَبْرِي
إِلاَّ بْبِلادِي.. وْيِنْكتبْ فَوْقُو:
مَاتْ تَا يِفْدِي شَعب وِبْلادْ..
**

اقلب الصفحة من فضلك

احترق لبنان

2005-02-06T01:30:00.002+11:00

احترق لبنان
ـ1ـ
.. وْسَافَرْتْ مِتْل اللِّي قَبْلِي سَافَرُوا
وْبِنْيُوا وَطَنْ تَانِي
عَ أَرْضْ.. مَا بْتَعْرِفْ حَضَارَه وْلا عِلِمْ
عَ أَرْضْ.. مَا دَاقِتْ بَعِدْ طَعْم السِّلِمْ
وْبِأْشَارْتَيْن زْغَارْ صَارُوا يْغَيّرُوا
طْبَاع الْبَشَرْ
الْـ بَعْدَا حَجَرْ!!
صَارُوا إِذَا فِرْحِتْ قَبِيلِه يْنَوّرُوا
تْلال الْقَبِيلِه التَّانْيِه
وْصَارُوا إِذَا حِزْنِتْ قَبِيلِه يْدَوّرُوا
الْحُزْن بْقَبِيلِه تَانْيِه!!
وْبَعِدْ مُدِّه مْنِ الزَّمَنْ
اتَّحْدُوا الْقَبَايِلْ كِلّهَا
وْسَنُّوا قَوَانِينْ الْوَطَنْ
وْصَار الْجَمِيع يْجِلّهَا
وْكِبْرُوا سَوَا
وْصَارُوا سَوَا
يْدُوسُوا الْقَمَرْ
وْصَارُوا إِذَا مِسْكُوا حَجَرْ
يْصِيرْ الْحَجَرْ بُنْيَانْ!!
وْصَارُوا إِذَا نَفْخُوا هَوَا
يْصِير الْهَوَا إِنْسَانْ!!
ـ2ـ
.. وْسَافَرْتْ مِتْل اللِّي قَبْلِي سَافَرُوا
تَا يْزَوْزِقُوا وِيْصَوِّرُوا
وِيْفَبْرِكُوا بُلْدَانْ
تْكُونْ نَسْخَه عَنْ جَبَلْ لُبْنَانْ
وْكِتْرِت الْبُلْدَانْ
وْعِمْرِت الْبُلْدَانْ
وْصِرْنَا إِذَا دْعَسْنَا الْبَحْرْ
نْزِيد الْبَحرْ إِيمَانْ
لَكِنْ يَا حَسْرَه مْنِ الْقَهرْ
تْفَرفَطْ شَعبْ لُبْنَانْ
وِاحْتَرَقْ لُبْنَانْ!!
**
عيب إنّي إتركو
عَيْب إِنِّي إِتِرْكُو وْإِرْحَلْ
هَـ الْـ كَانْ مَلْوَى الْكَوْنْ
وْلَوْن أَبْهَى لَوْنْ
وْأَجْمَل مِنِ الأَجْمَلْ
ما نْسِيتْ خَيْرَاتُو.. وْصَعِبْ إِنْسَى
بِقْسَى يا إِبْنِي عْلَيْك
عَ زَقْزَقِةْ عِينَيْكْ
وِعْلَيْه ما بِقْسَى
بْشُوفُو وَقِتْ ما بْنَامْ
مَجْرُوحْ.. وِجْرُوحُو
شْفَاف انْتَلُوا بِكْلامْ
وِبْيِستْحُوا يْبُوحُوا
بْسِرّ اللّي رَاحُوا أَو عَم يْرُوحُوا
مِن ظُلْم هَـ الأَيَّامْ!!
**
فخر
كِنْتُو فَخْرْ
كِنْتُو فَخْرْ
شُو اللِّي حَصَلْ حَتَّى انْقَلَبْتُوا عَارْ
مِنْ بَعْدْ مَا عِشْتُوا دَهْرْ
تِمْشُوا وْتَحْتْ إِجْرَيْكُنْ يْفَرِّخْ زَهْرْ
وْعَ رُوسْكُنْ مَرْفُوع تاجْ الْغَارْ؟!
**

مش رح صدّق
مُشْ رَحْ صَدِّقْ.. مُشْ رَحْ صَدِّقْ
إِنُّو بْلادِي صَارِتْ غَابِه
وْإِنُّو شَعْبِي تْحَوَّلْ طَابِه
وْإِنُّو مِلح الْحُبّ الصَّافِي
فسد.. وْبَعْدُو الْغَافِي غَافِي
وْإِنُّو الطّفل الْـ بَعْدُو زْغَيَّرْ
يَللِّي عَ شْفَافُو بْتِتْغَيَّرْ
فْصُول فْصُولْ.. وْمَا بْيِتْغَيَّرْ
وِبْضِحْكِة سِنُّو بِيزَوْزِقْ
أَلف نِجْمِه.. مُشْ رَحْ صَدِّقْ
إِنُّو بِرْصَاصَه.. بِنْحَاسِه
قَوَّصْهَا بُو الْقَلْب الْقَاسِي
يْمُوتْ.. وْبَعْدُو الْقَاتِلْ طَيِّبْ
يِعْمِي قَلْبُنْ.. شِي بِيكَهْرِبْ!!
**
زينة الأسامي
ـ1ـ
يَا وَطَنِي.. يَا زِينة الأَسَامِي
مِنْ يَوْم مَا قَتْلُوكْ
وْبِالْبُغضْ رِمْيُوكْ
اسْتَحْيِت الأَسَامِي
وِانْمَحْيِت الأَسَامِي!!
ـ2ـ
وْنِحْنَا اللِّي انْسَلَخْنَا
عَنْ أَرْضَك الْمَغْزُولِه بْدَمْعَاتْنَا وِصْرِيخْنَا
بِالْغُرْبِه رْسَمْنَاكْ
وَطَنْ وِسْكَنَّاكْ
وْصِرْنَا فِيكْ نِسْعَدْ
وْنِفْرَح وْنِتْهَنَّى
شَرْبِل وْأَحْمَدْ
وْمَعْرُوف وْحَنَّا
ـ3ـ
يَا وَطَنِي.. يَا هَدَفِي السَّامِي
لا تْخَاف مْنِ الْحَرَامِي
الْـ عَمْ يِسْرُقْ أَسَامِي
بَعْدَكْ بِغُرْبِتْنَا
مْسَيَّجْ بِمْحَبِّتْنَا
وِبْوِحْدِة كِلْمِتْنَا
مَهْمَا الدِّنِي جَارِتْ أَوْ قَامِتْ الْقِيَامِه!!

اقلب الصفحة من فضلك

قفا لبنان

2005-02-06T01:23:00.005+11:00

قَفا لبنان
ـ1ـ
.. وْكَانُوا يْقُولُوا بْلادْ الْخَيْرْ
هِيِّي بْلادِي
بْلادْ النَّسْمِه.. بْلاد الطَّيْرْ
وجَوّ الْهَادِي!!
ـ2ـ
.. وْكَانُوا يْقُولُوا إِنُّو بْلادِي
قِطْعِةْ سَمَا
أَللَّه.. لَوْلاَ وَفَا جْدُودِي
مَا تْقَاسَمَا!!
ـ3ـ
.. وْضَلُّوا يْغَنُّوا رْوَابِيهَا
تَا صَارِتْ حُلْمْ
وْبِالآخِرْ.. شَكُّوا فِيهَا
رَايَاتْ الدَّمّْ
ـ4ـ
وِالنَّاسْ الْـ مَاتُوا صَارُوا
حْكَايَات كْبَارْ
يِحْكِيهَا الْجَارْ لْجَارُو
عَنْ شَعْب حْمَارْ
ـ5ـ
رِضِي يِحْرُق دْيَارُو
بْقَلب غضْبَانْ
وْرِضِي يْفَوِّتْ مِسْمَارُو
بْقَفَا لُبْنَانْ!!
**
مغول
بَسّْ.. بَسّْ..
هَيْدَا كذْب.. مُشْ مَعْقُولْ
بِنْتْ قَتْلُوهَا وْصَارُوا
يِتْبَادْلُوا عْلَيْهَا الْمَغُولْ
شُو ذَنْبَا.. يَا سَامِعْ قُولْ؟!!
شُو ذَنْبَا.. يَا سَامِعْ قُولْ؟!!
رُوحَا عِنْد الْخَالِقْ فَوْقْ
وِاللِّي مَا فِي عِنْدُنْ ذَوْقْ
شِي بِالعُرْض.. وْشِي بِالطُّولْ
وْشِي مِنْ تَحْت.. وْشِي مِنْ فَوْقْ
وْشِي.. يَا أَللَّـه كْفَرْنَا بَسّْ
رِجْعُوا قَصُّوهَا بِالنِّصّْ!!!
**
شُو دينَك؟
.. وِبْتِسْأَلُونِي إِنْتْ شُو دِينَكْ
وْمَا بْتِسْتِحُوا؟!!
قَلْبْ اَللَّـه بْتِجْرَحُوا..
الدِّينْ.. مُشْ مُلْك الْبَشَرْ
الْـ لِعْبُوا بِإِسْمُوا مِتِلْ مَا بْيِلْعَبْ قَدَرْ
الدِّينْ.. مُلكْ أَللَّـه
يِعْنِي التَّقِي الْـ عُمْرُو نَدَرْ
وْبِالْحُبّ غَازِلْ مَشْلَحُو
بْيُوصَلْ لأَللَّـه
كِيفْ مَا صَلَّى!!
**
يمين.. يسار
أَنَا ما بِفْهَمْ يَمِينْ
أَنا ما بِفْهَمْ يَسَارْ
أَنَا بِفْهَمْ إِنُّو النَّارْ
لازِمْ تُوقَفْ مَهْمَا صَارْ
بْحَيْث الْـ عَمْ بِيمُوتُوا هَيْكْ
مَا انْوَجْدُوا بْخَاتـم لِبَّيْكْ
وْلا بْقِنْدِيلْ عَلاء الدِّينْ!!
هَوْدِي أَهْلِي الِمْحِبِّينْ
هَوْدِي رِبْيُوا جَار وْجَارْ
يِعْنِي.. مَهْمَا الدُّولابْ دَارْ
وْحِكْيُوا وْفَبْرَكُوا أَخْبَارْ
رَحْ يِبْقُوا لُبْنَانِيِّينْ
رَحْ يِبْقُوا لُبْنَانِيِّينْ
رَحْ يِبْقُوا لُبْنَانِيِّينْ
**
تبرّع..
ـ1ـ
تْبَرَّعْ..
الطّفلْ جَاع وْشَيخْنَا تْشَرَّدْ
وْمِينْ أَكْرَمْ مِنَّك وْأَجْوَدْ
يَا قَلْبْ مِنْ أَوْسَعْ دِنِي أَوْسَعْ!!
ـ2ـ
تْبَرَّعْ..
مُشْ هَمّ مِسْلِمْ كِنْتْ
أَوْ كِنْت نصْرَانِي
لُبنان مُلْكَكْ إِنْتْ
مَا بْتِملكُو دْيَانِه!!
ـ3ـ
دُولارْ... عَشْرَه.. أْلُوفْ.. كِلُّو مْنِيحْ
الِمْهِمْ نِقْوَى عَ مْهَبّ الرِّيحْ
الْـ عَمِ يْشَلِّعْ بِالْوَطَنْ
وْيِبْدُرْ بِأَرْضُو خْرَابْ وِدْمُوع وْمِحَنْ
وْنِخْنُقْ بِإِيدَيْنَا غْرَاب الْبَيْنْ
وْنِرْوِي بْدَمُّو عَطَش الإِيدَيْنْ..
ـ4ـ
تْبَرَّعْ..
فِي ناس عَمْ بِتْمُوتْ
مِنْ قِلِّة الإِسْعَافْ
مِنْ ظُلمْ.. خَلاَّ بْيُوتْ
رَهْن الدَّوَا وِالْقُوتْ
وْعَ طْفَالْهَا بِتْخَافْ
وْيَا سَاكِن الْهجْرانْ
يَا نُورْ عِينَيِّي
كِل مَا سألْ لُبْنَانْ
بِتْفِيضْ حِنِّيِّه
وْكِلْ مَا بِكِي إِنْسَانْ
بِتْقُولْ: يَا خَيِّي
تَا صِرْتْ لِلأَوْطَانْ
نِعْمِه إِلَهِيِّه..
ـ5ـ
تْبَرَّعْ..
يَا قَلْب مِنْ أَوْسَعْ دِنِي أَوْسَعْ..

اقلب الصفحة من فضلك

مجانين

2005-02-06T01:23:00.004+11:00

ميمتي
ـ1ـ
.. وْبِتْذَكّرِكْ يَا مَيْمتِي مَوْقِدْ
بِتْذَكّرِكْ تَنُّورْ
بِتْذَكّرِكْ مَسْنِدْ
وْبَيْتْ مِنْ دُونْ سُورْ
بِتْذَكّرِكْ قَلْب وْعَطَا وِزْهُورْ
ـ2ـ
.. وْبِتْذَكّرِكْ وِبْقُولْ:
يَا رَيْتْ كَانْ الْمَوْتْ أَقْرَبْ مِنِ التّذْكَارْ
مَا كَانْ دَمْعِي سْيُولْ
وْلا كانْ دَمِّي نَارْ
يَا ميْمتِي اللِّي مْشَرّدِه بِالْبَرْدْ
شُو صَارْ بِاللِّي قَبْلْ
شُو صَارْ بِاللِّي بَعْدْ
بْعَصْرْ صَفَّى الصَّخْر مِتل الرَّمْلْ
وِالْبَيْتْ عَمْ يِنْهَدّْ!!
**
خانوا الوطن
ـ1ـ
هْجَرْت بْلادِي بْسَاعِة قَهْرْ
وْبَعْدَا لِلْيَوْم دْمُوعِي
بْتِشْهَدْ عَ إِنُّو رْجُوعِي
كانْ لَوْلا هَاك الطُّوفَانْ
الْمِتْلَطَّى بْحِقْد الإِنْسَانْ
شَخْتُورَه بِعْبَاب الْبَحْرْ
ـ2ـ
لُبنان الْـ دِبْت بْحُبُّو
وْغِرْت عْلَيْه مْنِ النَّسْمِه
احْتَرَقْ عَ أْيَادِي شَعْبُو
احْتَرَقْ.. شُو نَفْع الْكِلْمِه؟!
وْهَـ الشَّبَابْ اللِّي تْرَبُّوا
تَا حَتَّى يْقُودُوا الأُمِّه
خَانُوا الوطَنْ وِتْخَبُّوا
خَلْف الدِّين الْـ مُشْ مَحْبُوبْ
إِلاَّ ما يْوَحِّد قْلُوبْ
وْصَارُوا يِحْكُوا بِالْقِسْمِه
وْيِرْمُوا بَيْن النّاس حْدُودْ..
يِعْنِي صهرنا مَحْمُودْ
الْـ مِنْعِدُّو أَغْلَى حَبِيبْ
لازِم يْطَلِّقْ وِيْسِيبْ
مِرْيَانَا.. بِنتْ عَمِّي!!
ـ3ـ
وْإِبْنُنْ وَحِيدُنْ عِصَامْ
يَللِّي نِصُّو نِصْرَانِي
وْنِصُّو تَابِعْ لِلإِسْلامْ
شُو بَدكُنْ.. عَ الْعِمْيَانِي
قِسْمِةْ عَدلْ نِقِسْمُو
تَا حَتَّى نِرْضِي بَيُّو
أَوْ تَا مَا نْزَعِّلْ إِمُّو؟!!!
ـ4ـ
وْنِحْنَا اللِّي هْجَرْنَا مْنِ سْنِينْ
وْبِقْلُوبْنَا بَعْدُو الْحَنِينْ
عَمْ يِكْوِينَا لَيْل نْهَارْ
مُشْ رَحْ نِمْضِي عَ قَرَارْ
يْلَطِّخْ إِيدَيْنَا بِالْعَارْ
وْيِحْرُقْ دِينْ الْمُغْتِرْبِينْ!!
**
مجانين
ـ1ـ
وَقْت اللِّي بْحَاكِيكُنْ
لا تْقُولُوا هَيْدَا نِصْرَانِي
وَقْت اللِّي بْحَاكِيكُنْ
لا تْقُولُوا هَيْدَا قُرْآنِي
أَنَا مَا بْحَاكِيكُنْ
وْلا الْحَكِي بْيِطْلَعْ عَ لْسَانِي
إِلاَّ مَا حَاكِيكُنْ
لُبْنَانِي إِبنْ لُبْنَانِي..
ـ2ـ
تَا نِرْجَعْ مُدِّه لْوَرَا
وْنِحْكِي بِاللِّي كَانْ يْصِيرْ
عَ إِيَّامْ عَبْدِ النَّاصِرْ
زَعِيمْ الشَّعْب الِكْبِيرْ
كَانْ مِنْتِصر وْثَائِرْ
فَافْتَكَرْ إِنُّو قَدِيرْ
يْزَوِّجْ وِيْطَلِّقْ بُلْدَانْ
مِتل الرِّجَّالْ وِالْمَرَا
وْحَبّ يْحَرِّب بْلُبْنَانْ
وْيِقْدُفْ بِإِجْرُو الْكُرَه
وْبَعد مُدِّه مْنِ الزَّمَانْ
اعْتَرَفْ بِأَنُّو لُبْنَانْ
كِلُّو أَحْزَاب وْأَدْيَانْ
مِتِلْ عَرْنُوس الدَّرَه!!
وْقَالْ كِلمتُو الشَّهِيرِه:
" مُشْ مُمْكِنْ لُبْنَان يْضَلّْ
جِسْر وْمَنَارَه لِلْكلّْ
إِذَا فسْدِتِ الْخَمِيرِه!!"
ـ3ـ
الْمَسِيحِيِّينْ بْلُبْنَانْ
بِيحِبُّوا الْعَرَبْ كِلُّنْ
رَغمْ كِلّ مْشَاكِلُنْ
يَللِّي سْلَيْمَان الْحَكِيمْ
الْـ بِيقُولُوا عَنُّو فهْمَانْ
لَوْلا عَاد بْهَـالزَّمَانْ
بْيِعْجَزْ إِنُّو يِكَتِّلُنْ!!
ـ4ـ
ضِيعان الأَمْوَال تْرُوحْ
هَدِرْ بِبْلاد الأَرْزِه
وْفَوْق الْجُرْح نْزِيدْ جْرُوحْ
وِعْيُون الإِمَّات تْنُوحْ
وْكِلّ مَا انْخَطَفْ طُفْل زْغِيرْ
نِسْمَع.. وْنِقْرَا بَكِّيرْ:
" بِـ بَلَدْ إِسْمُو لُبْنَانْ
عَمْ بِيصِيرْ إِجْرَام كْتِيرْ
جِهَّه قَتْلُوا إِبْنِ فْلاَنْ
وِالظَّاهِرْ زَعِيم كْبِيرْ
رِجْعُوا تَانِي جِهَّه كْمَانْ
رَبْطُوا وْلَقْطُوا طفل زْغِيرْ
وْعَ كَعبْ أَحْلَى أَرْزِه
دَبْحُوهْ مِتْلِ الْعَنْزِه!!!"
ـ5ـ
يَا يَسُوع الْمَصْلُوبْ
وْيَا رَسُول الْمُؤْمِنِينْ
مَا عْرِفْتُوا رِبَّيْتُوا شْعُوبْ
عْرِفْتُوا رِبَّيْتُوا مْجَانِينْ
وْكِل مَا طلع عْلَيِّي الضَّوّْ
رَحْ إِرْفَعْ رَاسِي بِالْجَوّْ
وْإِسْأَلْكُنْ بِإِسْم الدِّينْ
وْبِالإِنْجِيلْ وْبِالْقُرْآنْ
إِذَا كِنْتُوا زِعْلانِينْ
تْرَاضُوا.. وْإِذَا مِتّفْقِينْ
حَرَام تْسِيبُوا لُبْنَانْ!!
**

اقلب الصفحة من فضلك

قلبي وطن

2005-02-06T01:20:00.002+11:00

قلبي وطن
ـ1ـ
لَيْشْ دَخْلَكْ لَيْشْ يَا رَبِّي
تْرَكتْ قَلْبِي يُولَعْ وْيِسْوَدّْ
وْغَيْرَكْ يَا رَبِّي مَا سَكَنْ قَلْبِي
وْلا يَوْم جِرَّحْتُو بْشَوْك الْبُغْضْ
وْلا فْرَشْتْ عَ خْدُودُو غْبَار الأَرْضْ
قَلْبِي وَطَنْ مَزْرُوعْ بِمْحَبِّه
حْرَامْ يَا رَبِّي الْوَطَنْ يِنْهَدّْ
ـ2ـ
لَوْ كَانْ شِي مَرَّه سْمِعتْ مِنِّي
كِلْمِه زْغِيرِه تِجْرَحَكْ.. لَعْنِه
كِنْتْ نِتْفِه عَ الْجُرح عِضَّيْتْ
وْكِنْت نْدَرتْ.. كِنْت رْكَعتْ صِلَّيْتْ
وْصِرْت مَجِّدْ إِسْمَكْ وْغَنِّي
كِرْمَالْ تِطْرُدْ ناسْ مِتِّفْقِينْ
يِقْضُوا عَ شَعْب مْعَتَّر وْمِسْكِينْ
بِيغَمّضُوا عْيُونُو بْإِسْم الدِّينْ
بْإِسْم الْعُرُوبِه وِالدَّهَبْ وِالْبَنْزِينْ
بْإِسْم الدُّولارْ وْكِلّ شِي فِي مْنَافْقِينْ
بْإِسْم السِّيَادِه وِالْحَضَارَه وِالْيَقِينْ
بْإِسْم الْعَدَالِه.. بْإِسْم كِلّ الْمَحْرُومِينْ
بْإِسْم الْقَضِيِّه.. بْإِسْم نَاسْ مْشَرّدِينْ
وْمِتِلْ شِي بَطِّيخْ عَ السِّكِّينْ
بْيِدْبَحُوهْ عَ عَتْبِة بْوَابُو
وْبِيوَزّعُوا تْيَابُو
وْبِالرَّغْمْ مِنْ جرْحُو وْمِنِ عْذَابُو
بْيِرْكَعْ يْقِلَّكْ: " يَا رَبّ الْكَوْنْ
إِنْتْ هَيْك حْكَمْتْ
وْنِحْنَا بْحِكْمَكْ رَاضْيِينْ
إِنْتْ هَيْكْ رْسَمْتْ
وْنِحْنَا الْعَبِيدْ الطَّايْعِينْ
وْمِنْ مِينْ غَيْرَكْ قِلّنَا مِنْ مِينْ
مْنِطْلُبْ يَا رَبّ الْعَوْنْ؟!!"
ـ3ـ
وْحَقّ السَّمَا وِالأَرْضْ مَغْشُوشِينْ
وْمِتلْ شِي قِطْعَانْ مِنْقَادِينْ
لِرْجَالْ سَمُّوهنْ رْجَالْ الدِّينْ
لأَهْل السِّيَاسِه الْكِذَّابِينْ النِّصَّابِينْ
دَمّنَا بَاعُوه بِمْلاَيِينْ
وْعَلّبُوا لْحُومَاتْنَا مِتْل الْبَقَرْ
مِتل سَمْك الطُّونْ وِالسَّرْدِينْ
وْنِحْنَا اللِّي إِنْت جْبَرْتْنَا نِخْلَقْ بَشَرْ
عَ قَدّ مَا مِنْخَافْ يَوْم الآخرَه
مْنِنْحِنِي قِدَّامَك وْمِنْقُولْ:
" مَعْقُولْ عِنْدُنْ عِذِرْهُنْ مَعْقُولْ
عْطِيهُنْ يَا رَبّ الْمَغِفْرَه؟!"
ـ4ـ
.. وْشُو بْخَبّرَكْ يَا رَبّ عَنْ بَيْرُوتْ
مْدِينْةِ الْمرْجانْ وِالْيَاقُوتْ
سَرْقُوا مْحَلاَّتَا
وْهَدْمُوا بِنَايَاتَا
وْصَلُّوا وْصَامُوا شَهرْ حَتَّى تْمُوتْ
وْمُسْتَحِيل تْمُوتْ
مْدِينْةِ الْـ مَسْمِحِلْهَا تِحْكِي
وْسَاعِةْ مَا بَدَّا تِضْحَكْ وْتِبْكِي
وْتِرْفَعْ إِيدَيْهَا لِلسَّمَا وْتِشْكِي
بِـ شَرقْ.. دَاعِسْ فَوْقْ مِنْخَارُو طَاغُوتْ
بِـ شَرْقْ.. صَفَّى لْكِلّ سكّانُو تَابُوتْ!!
ـ5ـ
بَيْرُوتْ.. هِيِّي الْعُرس وِالْعُرْسانْ
وْهِيِّي الطَّبل وِالزَّمْرْ
لَوْلا لْيَالِيهَا الرَّقصْ مَا كانْ
وْلا انْهَزّ بَطن وْخَصْرْ
وْيا ما الْفَرَحْ عَ شْطُوطْهَا سهْرَانْ
يْحَاكِي مْوَاجْ الْبَحْرْ
وِانْ كَانْ شِي مَرَّه الْقَمَرْ ضجْرانْ
وْحَاسِسْ بِنِتْفِةْ قَهْرْ
بْيِنْزل يْقَطِّفْ زَهرْ مِنْ بستانْ
غَافي عَ حفِّة نهرْ
وْيِقْعَدْ يْأَلِّفْ عَنْ جبل لبنانْ
أَحْلى قْصَايِد شِعْرْ
ـ6ـ
بَيْروت.. يا بَيْرُوت.. يَا مْدِينِه
مْزَيّنِه.. وْمُشْ نَاقْصَه زِينِه
تْنَعْشَرْ سِنِه عَمْ بِحْلَمِكْ بِاللَّيْلْ
قَوْلِكْ أَنَا مَكْتُوب عَ جْبِينِي
عِيشْ عُمْرِي بِالْهَجْر وِالْوَيْلْ
إِشْرَب دْمُوعِي وْآكُلْ سْنِينِي؟!
ـ7ـ
بَيْرُوتْ.. يا بَيروت.. مِشْتَقْلِكْ
وْما هَمّنِي لَوْلا تْهِدَّمْتِي
وْما هَمّنِي لَوْ هَجّرُوا أَهْلِكْ
وْقِدَّامْ عَيْنِكْ يِدْبَحُوا طِفلِكْ
الْـ بيهِمّنِي تْضَلِّي عَ إِيمَانِكْ
بْأَرْزِكْ، بِصنِّينِكْ، بِلُبنانِكْ
وِبْكِلّ أَدْيَانِكْ
وْما تِيْأَسِي إِنْتِي
إِنْتِي إِذا يْئِسْتِي
بِتْكُون ضَرْبِه قَاضْيِه عْلَيْنَا
بْتِطْفِي أَمَلْنَا وْنُورْ عِينَيْنَا..
ـ8ـ
وْشُو بْخَبّرَكْ عَنْ شَبّ إِسْمُو "جْنُوبْ"
عَن شَبّ أَسْمَر مِتل طَرْبِينْ الْحَبَقْ
عَنْ شَبّ مارِدْ بَعد مِتلُو ما انْخَلَقْ
مَلْيُون ضَرْبِه بْيِضِرْبُوهْ
وْمليُون جَلْدِه بْيِجِلْدُوهْ
وِبْيِخْلَقُوا مِنّو أَلف "مَصْلُوبْ"!!
شُو بْخَبّرَكْ يَا رَبّ.. يَا جَبّارْ
عَنْ وَحشنةْ كفَّارْ
خَتْمُوا عَ تذْكرْتُو إِسم "مَغْضُوبْ"
وْكَتْبُوا عَ صَدرُو جُملْتَيْنْ زْغَارْ:
"مَحْكُومْ إِنُّو يْشُوفْ بِعْيُونُو دَمَارْ
ويِفْلَح ويِزْرَع كلّ أَرْضاتُو حْرُوبْ
حَتّى إِذَا جاع وْعِطِشْ يا رَبّْ
مَمنوع يِشْرَبْ غَير دَمّ ونارْ
وْمَمْنوع يلبسْ غَيرْ ذلّ وْعَارْ!!
ـ9ـ
دقَّيْت عَ بْوابَكْ سْنِينْ سْنِينْ
وْمَا كنتْ تِسْمَعْنِي
وْصرْتْ صَرِّخْ متل صَرْخات الْجَنِينْ
الْجَايِي غَصبْ عَنُّو
عَ كَوْنْ.. صَعْبِه يِنْتِفِعْ مِنُّو
عَ كَوْن.. سكَّانُو انْتَهُوا وْجَنُّوا
وْما عِدْتْ فِيك تْقُول: هَوْدِي مَظْلُومِينْ
وْهَوْدِي نَصَارَى.. وْحَدّ مِنُّنْ مسلْمِينْ
وْهَوْدِي يَهُودْ مْشَتَّتِينْ مْطَيْشَرينْ
وْهَوْدِي تَتَرْ
هَوْدِي نَوَرْ
هَوْدِي جَمَاعَه مْوَحّدينْ
كِلُّنْ يَا رَبِّي ظَالْمِينْ
كِلُّنْ طُغَاةْ
لا بْيؤمنوا بْإِنْجِيلْ
لا بيؤمنوا بْقُرآنْ
حَتَّى وَلا بْتَوْرَاةْ
وْلا حَاسْبِينْ حْسابْ يَوم الدِّينْ!!
ـ10ـ
يئسانْ مِنْ حالي أَنا يئسانْ
يئسَانْ حَتَّى الْمَوْتْ
وِانْبَحّ فِيِّي الصَّوْتْ
بْصَرِّخْ.. بْصَرِّخْ بَيْن هَـ الطّرْشَانْ
بَرْكِي بْيِسْمَعْ صَرخْتِي إِنْسَانْ
بَعْدُو بْيُؤمِنْ فِيكْ عَنْ وِجْدانْ
تَا مِدّ إِيدِي وْإِشْبِكَا بْإِيدُو
وْكِلّ شِي إِنِتْ يَا رَبّ بِتْرِيدُو
مِنَّفِّذُو بِـ تَضْحِيِه وْإِيمَانْ
عَ شَرْطْ.. عَفْوَكْ لَوْ أَنا شَارَطْتْ
يْكُونْ يخدُم مَصلحة لُبْنَانْ..

اقلب الصفحة من فضلك

خالد كحّول

2005-02-06T01:15:00.004+11:00

خالد كحّول
(بينما كانت إحدى السيّارات العسكرية تقلّ عدداً من الجنود اللبنانيين الى مقر القيادة العسكرية في اليرزة، حتى استوقفهم مسلحون.. فطلبوا من الجنود المسيحيين النزول والمسلمين متابعة سيرهم، لكن الجندي خالد كحول من برجا، وقف في طريقهم وصاح: نحن جنود لبنان، وليس بيننا مسلم أو مسيحي، فإذا أردتـم قتلهم فاقتلونا جميعاً. فأحرج المسلحون وتركوا الجنود)
(النهار البيروتية)
ـ1ـ
مَهما يَا لُبنانْ تْجُولْ
خْيُول الْحَرب بْعُرْض وْطُولْ
رَحْ تِبْقَى خَالِدْ منصَانْ
وْيِبْقَى الأَرْزْ الْـ عَ حْفَافِيكْ
يِحْكِي أُسْطورةْ لُبْنانْ
عَنْ عِيشِةْ مَسِيحِيِّيكْ
وْإِسْلامَكْ.. مَدَى الأَزْمَانْ
وْيِرْجعْ يَللِّي تْغَنَّى فِيكْ
يِتْغَنَّى.. وْبِلْيَالِي الْحُبّ
غَيْر الصَّلا.. مَا يْحَاكِيكْ
ـ2ـ
بْكِينَا.. وْصَفَّى الدَّمْع بْحُورْ
وْقِلْنَا: نَجْحُوا بْقِسْمِتْنا
وْخَنْقُوا فِينَا مْحَبِّتْنَا
وْصدْفِه.. بْلَيْل الشِّدِّه.. نُورْ
بْيِضْوِي عْلَيْنَا بْغُرْبِتْنَا
ـ3ـ
جُندِي لُبْنانِي مَجْهُولْ!!
مْأَكَّدْ.. مَجْدُو لْفَخْر الدِّينْ
تْجَسَّدْ بِخالِدْ كَحُّولْ
هَـ النّسر الشَّامِخْ عَ طُولْ
الْـ صَار بْوَقت الْحَزِّه يْقُولْ:
"اقْتُلُونِي.. مَنِّي خَايِفْ
مَعْ إِخْوَانِي الْمَسيحِيِّينْ
نِحْنَا ما عِنّا طَوَايِفْ
نِحْنَا جْنُودْ لْكِلّ لُبْنَانْ
الْـ رَحْ يِبْقَى عالي وْمنصَانْ
مَهْما قُوْيِت الْعَوَاصِفْ"
ـ4ـ
بْإِسْمِي.. بْإِسْم الْمَظْلُومِينْ
بْقِلَّكْ يَا خَالِدْ كَحُّولْ
يِتْمَجَّدْ إِسْمَكْ عَ طُولْ
يَا مْبَلْسمْ قَلبْ الإمَّاتْ
وْيَا شَفِيع الْمُغْتِرْبِينْ
**
قاوِم
قَاوِمْ.. يَا شَعْبِي قَاوِمْ
مُشْ حَقّ تْضَلّ مْسَالِـمْ
بَاعُوا دَمَّكْ بِالدُّولارْ
وْعَبُّوا دْمُوعَكْ بِمْحَارِمْ
وْعِنْدُنْ تُخْمِه مْنِ الْكَفْيَارْ
وْإِنْتَ مْنِ القِلِّه صَايِمْ!!
لا تْصَدِّقْهُنْ مَهْمَا صَارْ
اهْتَرْيِتْ بِالإِدْن مْزَاعِمْ
حْمَالْ بْإِيدَكْ سَيْف النَّارْ
وْوَقِّفْ عَ الشَّمْس سْلالِـمْ
وْقِلاَّ: يَا بْلاد الأَحْرَارْ
رَحْ إِهْدِيكِي تَاج الْغَارْ
وْبَاقِةْ مُوسِيقى وْأَشْعَارْ
بِتْقَلِّقْ عَيْن الْحَاكِمْ!!..
**
بطن الأبد
يا حَجَرْ.. يا طَيْرْ.. يَا حيوانْ
وْيَا إِبن هَـ الإِنْسانْ
يَللِّي جَرَى بْلُبنانْ
مُشْ حَرْبْ بينْ أَدْيَانْ
مْأَكَّدْ وَطَنْ رَح يِنْوَلَدْ
مِنْ بَطنْ.. عَ طُولْ الأَبَدْ
بْيِحْبَلْ بْبُلْدانْ!!
**
ليل نهار
ـ1ـ
يا وَطَنِي اللِّي صَارْ
مُشْ مُمْكن يْصِيرْ
عَمْ تحصدَكْ النَّارْ
وِيْلِفَّكْ التِّعْتِيرْ
بِالْغُرْبِه لَيْل نْهَارْ
عَمْ نِرْسُم تْصَاوِيرْ
لأَرْزَك الْجَبَّارْ
وِلْشَعْبَكْ الْمنْهَانْ
يا وَطَنِي لُبْنانْ
ـ2ـ
عَم تغزلَكْ عِينَيْنْ
بِمْغَازِلْ الْهَنَا
وْعَمْ تِكتبَكْ إِيدَيْنْ
عَ صَفْحات الْمُنَى
مَهْما غْراب الْبَيْنْ
طَيَّرْ وِاغْتَنَى
بِتْضَلَّكْ أَرْض تْنَيْنْ
أَللـه وِالإِنْسَانْ
يَا وَطَنِي لُبْنانْ..

اقلب الصفحة من فضلك

مشلح من الفل

2005-02-06T01:13:00.003+11:00

مشلح من الفل
كل ما صَباح يْطِلّْ
وِنْوَدِّعْ مَسَا
مِنْقُولْ كِل شِي صَارْ بُكْرَا بْيِنَّسَى..
الأَرْضْ اللِّي لِبْسِتْ مَشْلَح مْنِ الفلّْ
مَهْمَا كْوِيتَا بْنَارْ
وِرْمِيتَا بْدَمَارْ
ما بْتِبْدِلُو بْتَوب الأَسَى..
**

تاريخ هجرتنا
ـ1ـ
أَرْضَك فْرَاشِي
وْجَوَّك لْحَافِي
وْهَمَّكْ صَلِيب مْكَسَّر كْتَافِي
نِحْنَا إِذَا فْرِحْنَا بْتَارِيخْ هِجْرِتْنَا
لا تِفْتِكِرْ مِنْحِبّ غُرْبِتْنَا
يَا وَطَنِي الْمتْشَرَّدْ وْحَافِي
ـ2ـ
مْنِفْرَحْ كَرَامِةْ أُمّ حَضْنِتْنَا
وْوَقْت الِـ بْكِينَا بْحُبّ عَزِّتْنَا
وْوَقْت الِـ بْرَدْنَا بْرِيشْ غَطِّتْنَا
وْنَيّمِتْنَا بْحضِنْهَا الدَّافِي
ـ3ـ
وْبِنْجَاحْنَا أَوّل مَا هَنِّتْنَا
وِاسْتَقْبَلِتْ بِالشّكرْ خِدْمِتْنَا
أستْرَالْيَا.. الْـ إِسْمَا عَلَى شْفَافِي
أَرضْنَا الْحُرَّه الْمِضْيَافِه..
**
طاووس
ـ1ـ
إِنْتْ.. يَا إِنْت الْـ عَمِ بْتِسْهَرْ
وْيِسْهَرْ مَعَكْ كاسَكْ
فرْحَانْ.. قَاعِدْ هَيْك عَمْ تِسْكَرْ؟!
الْخَيْرْ بِخْوَابِيكْ
وِبْوَابَكْ مْسَكَّرْ
وْمَا يَوْمْ وِجْعَكْ عَ حَدَا رَاسَكْ
هْنِيَّالْ قَلْبَكْ كِيفْ مَا بْتِضْجَرْ؟!
ـ2ـ
إِنْتْ.. يَا مَاشِي عَلَى الْمَرْمَرْ
وْرَقبْتَكْ تِعْبِتْ مِنِ الْجَوْهَرْ
وْمِتِل شِي طَاوُوس بْتِمْشِي.. بْتِتْكَبَّرْ
شُو مِسْتِحِي حَاكِيكْ؟!
شُو مِسْتِحِي حَاكِيكْ؟!
زْغِيرْ إِنْت زْغِيرْ.. وْأَزْغَرْ مِنِ الأَزْغَرْ!!
**
بحبّك
بْحِبَّكْ يَا لُبْنَانْ
كِيفْ مَا كِنْت تْكُونْ
مْكَيَّف وْفرْحَانْ
أَوْ دَامِعْ الِعْيُونْ
بْحِبَّكْ بِرَبِيعَكْ
بْحِبَّكْ بِخَرِيفَك الْـ فَجَّرْ يَنَابِيعَكْ
بْحِبَّكْ بِشَتْوِيتَكْ
بْحِبَّكْ بِصَيْفِيتَكْ
بْحِبَّكْ مِنْ كَانُونْ
وِلْغَايِةْ كَانُونْ
بْحِبَّكْ يَا حَبِيبِي
لأَنَّكْ حَبِيبِي
كِيفْ مَا كِنْت تْكُونْ!!
**
جرح كبير
ضْحِكْتُوا عْلَيْنَا كْتِيرْ
وْصَارْ وَقِتْنَا نِحْنَا
نْدَاوِي الْجرحْ الِكْبِيرْ
الْـ فَجَّرْ جَوَارِحْنَا
الْـ خَلاَّ الزَّمَانْ يْصِيرْ
يْشَقْلِبْ مَطَارِحْنَا
وِبْسَاعِة التِّعْتِيرْ
يْشَمِّرْ تَا يِدْبَحْنَا..

اقلب الصفحة من فضلك

شياطين

2005-02-06T01:09:00.002+11:00

شياطين
ـ1ـ
.. وْبِتْذَكَّرْ الْمَاضِي
إِيَّامْ كَان الدِّينْ
يْعَانِي مْنِ رْجَالُو
اللِّي قَرْقَطُوا دْيَالُو
تَا يْفَبْرِكُوا سْلاطِينْ
تِلْتَيْنُن مْجَانِينْ
وِدْمَاغْهُنْ فَاضِي!!
ـ2ـ
.. وْمَرْقِت عْلَيْنَا سْنِينْ
وْبَعْدُو الشَّعبْ مسْكِينْ
مُشْ فَاهِم الأَدْيَانْ
إِنَّا صَلا وِخْشُوعْ
وِرْفُوفْ قِدِّيسِينْ
ضَوِّتْ حَيَاتَا شْمُوعْ
عَ مَدْبَح الدَّيَّانْ!!
ـ3ـ
.. وْبَعْدُو بْإِسْم الدِّينْ
عَمْ يِخْلَق سْلاطِينْ
شَكْلا شَكل إِنْسَانْ
وْفِعْلا فِعلْ شَيْطَانْ
وِلْهَالسَّبَبْ لُبْنَانْ
عَمْ تِحصدُو النِيرَانْ
وْتِسْتَملكُو شْيَاطِينْ!!
ـ4ـ
فِيقْ يا شَعْبِي
قَبلْ مَا الطُّوفَانْ
يِجْرُف مْحَبِّه
مْغَلْغَلِه مْنِ زْمَانْ
بِـ قَلْبَك وْقَلْبِي
ـ5ـ
وْهَاتْ إِيدَكْ هَاتْ
تَا إِشْبِكَا بْدَيِّي
عَهْد التَّعَصُّبْ مَاتْ
فِيقْ يَا خَيِّي
الإِنْجِيلْ وِالْقُرْآنْ
ما فَسَّرُوا الأَدْيَانْ
نَعْرَاتْ دِينِيِّه
ـ6ـ
وِتْأَكَّدْ.. الإِسْلامْ
خَيّ الْمَسِيحِيِّه
وِبْآخِر الأَيَّامْ
الْقُوِّه الإلهِيِّه
اللِّي مْسَيّرَه الأَكْوَانْ
عَ ذَوْقهَا هِيِّي
بِتْوَحِّد الإِنْسَانْ
بْجَنِّه سَمَاوِيِّه
ـ7ـ
وْيَللاَّ سَوَا تَا نْقُولْ:
انْحِنْيِي يَا رَقْبِتْنَا
لِلأَنْبِيَا عَ طُولْ
لِمْحَمَّد وْيَسُوعْ
وْغَسّلِي يَا دْمُوعْ
أَوْسَاخْ دِنْيِتْنَا..
**
ارجعوا
ـ1ـ
اشْتَقْنَا يَا بْلادِي اشْتَقْنَا
لِبْرُودَات الصّبْحِيِّه
وْلِلشَّمْس الْـ بِتْفَيِّقْنَا
بِجْدَايِلْهَا السِّحْرِيِّه
لِلطَّيْر الْـ عَمْ يِسْرِقْنَا
وْيِنْتُفْ تِينِه حْمَيْرِيِّه
اشْتَقْنَا تْرِفّ بْيَارِقْنَا
فَوْق الأَرْض الْمِحْمِيِّه
اللِّي فْلَحْنَاها وِعْرِقْنَا
اللِّي حْرَسْنَاهَا لَيْل نْهَارْ
تَا تِبْقَى لُبْنَانِيِّه
ـ2ـ
وْيَا أَهْلِي.. يَا مُغْتِرْبِينْ
أَشْعَارِي الْـ كِلاَّ إِحْسَاسْ
سْمَعُوهَا.. وْخَبُّوهَا سْنِينْ
بِقْلُوب بْتِسْكِنْهَا النَّاسْ
وْعَ بْلادي الْـ فِيهَا حْسَاسِينْ
غَنِّتْنَا مِنْ دُون قِيَاسْ
ارْجَعُوا.. يَا أَغْلَى مْحِبِّينْ
بِالْغُرْبِه مْنِبْقَى مْسَاكِينْ
مَهْمَا يْغَطِّينَا الإِلْمَاسْ!!

اقلب الصفحة من فضلك

وآخرتها شو؟

2005-02-06T01:08:00.002+11:00

وآخرتها شو؟
ـ1ـ
.. وْآخْرِتْهَا شُو؟!
كَمْشِةْ عُمرْ مَرْقِتْ
وْبَعْدُو غْرَاب الْبَيْنْ
عَمْ يِنْفُض رْيَاشُو
بِبْلادْ ضَاعِتْ بَيْنْ
أَطْمَاعْ حَنَّا وْزَيْنْ
وِبْدَمّهَا اخْتَنْقِتْ!
ـ2ـ
.. وْآخْرِتْهَا شُو؟!
وْأَطْفَالْنَا الْـ مِنْ حَقُّن يْنَامُوا
وْيِحْلَمُوا بِالنُّورْ
سَيْهَرُوا الدَّيْجُورْ
مِنْ كِتِرْ مَا انْضَامُوا
بِبْلادْ كلاَّ جُورْ
وْعَمْ تِرْتِمِي بِبْحُورْ
كذْب وْأَنَانِيِّه
وْصَفْقَاتْ مَالِيِّه
وْإِحْتِيَال وْزُورْ!!
ـ3ـ
.. وْآخْرِتْهَا شُو؟!
وْمَا ضَلّْ عِنَّا بَيْتْ
وَاقِفْ بِوِجّ الرِّيحْ
يِنْدَه عَلَى السِّكَّيْتْ:
يا رَيتْ رَسْمُوا زِيحْ
بَين الْكذبْ وِالْحَقّْ
ما كانْ ضَوِّي شْحِيحْ
وْلا كانْ حَيْطِي انْشَقّْ
"يا بَيْتنا الْمَشْلُوحْ عَ الطُّرْقَاتْ
وِتْشَرّدُوا حْبَابَكْ
وْعَ عَتْبِة بْوَابَكْ
حُبّ الْفَضِيلِه مَاتْ
وِانْطَمّ بِتْرَابَكْ
لَسْبِدّْ ما تِتْرَاجَع الأَيَّامْ
عَن ظُلمها الْمَقْصُودْ
وْتِتْغَيَّرْ بْإِسْم الشَّعبْ حُكَّامْ
قِرْفَان مِنْهَا الدُّودْ"..
ـ4ـ
.. وْآخْرِتْهَا شُو؟!
سَاعَه بْيِرْضَى فْلانْ
وْسَاعَاتْ بِيهاجِمْ
وْعَمْ يِحْترقْ لُبْنانْ
وْتِتْطَايَر جْمَاجِمْ
مُشْ عَارْفِينْ لْمِينْ؟!!
"جِيرانْ عاشُوا الْعُمرْ
عَ طُولْ مِتِّحْدِينْ
ما بْيِسْأَلُوا عَنْ دِينْ
دِينُنْ إِيمان وْفَخرْ
بِالأَرْز وِبْصِنِّينْ
لَكِنْ بِسَاعِةْ قَهْرْ
مِشْيُوا بْطَرِيقْ الْغَدْرْ
مَعْ زُمْرِة شْيَاطِينْ"
ـ5ـ
.. وْآخْرِتْهَا شُو؟!
الأيَّامْ تَرْكِتْنَا
بْبَحْر الْخَطِيِّه نْعُومْ
وْنِسْيِتْ عَ وِجَّا رْسُومْ
مِنْ وَهجْ ضِحْكِتْنَا
مِنْ لَوْن أَحْلَى غْيُومْ
مَرْقِتْ عَ تَلِّتْنَا
"افْتَكْرِتْ سْيُول الْحقْدْ
مْنِ زْمَانْ جَرْفِتْنَا
وْجَرْفِت حْرُوف الْمَجْدْ
مِنْ فَوْق صَفْحِتْنَا!!"
ـ6ـ
.. وْآخْرِتْهَا شُو؟!
وْبَعِدْنَا بْلُبْنَانْ
مْنِنْحِنِي لِفْلانْ
وْمِنْأَلِّه فْلَيْتَانْ
وِنْدُورْ بِمْدَارُو
الإِنْسَانْ أَللَّـه أَوْجَدُو إِنْسَانْ
تَا يِرْفَع شْعَارُو
وِيْمَجّدُو هُوِّي
وَحْدُو إِلَه الْحُبّ وِالْقُوِّه
الْـ مِنْ نَفْخِتُو بْيِلْوِي
أَكْبَرْ زَعِيمْ.. وْمِنْ هَوَا غْبَارُو
بْيِتْطَايَرُوا نْفَارِيتْ.. أَنْصَارُو
ـ7ـ
.. وْآخْرِتْهَا شُو؟!
ما عَادْ فِينَا دَمّْ
عَ كِتِرْ ما تْعِبْنَا
وْزَادِتْ مَصَايِبْنَا
ضِعْنَا بْزَاوَايَا الْعَتْمْ
لا الشَّمْسْ بَعْدَا شَمْسْ
وْلا نُورْهَا بْيِلْمَعْ
حَتَّى غْنَانِي الأَمْسْ
بِالْكَادْ نِتْسَمَّعْ
صِرْنَا عْذَاب النَّفْسْ
وْصِرْنَا التّنْهِيدَاتْ
وْلَوْلا مَرَقْ شِي عرْسْ
مِنْخَزِّق الزِّيناتْ
ـ8ـ
.. وْآخْرِتها شُو؟!
وْنِحْنَا اللِّي عَمْ نِخْسَرْ
هَـ الأَرْضْ وِالأَحْبَابْ
اللِّي تْحَوّلُوا لِتْرَابْ
كِرْمَالْ يِتْمَخْطَرْ
فَوْقُو الزَّعِيمْ السَّافِل النّصَّابْ
يَللِّي بْتِمُّو نْيَابْ
بِتْقَرْقِط الْخَنْجَرْ
ـ9ـ
يَا رَيْت فِيِّي خَلِّص بْلادِي
مِنْ كِلّ آلامَا
وْتِدْجِيلْ حُكَّامَا
وْتبْوِيسْ الأْيَادِي
وْيَا رَيتْ فِيِّي إِشترِي بْدَمِّي
أَمْن الشَّعبْ كِلُّو
وْبَدْل "الْعَشِيرِه" يْقَدِّس "الأُمِّه"
وِيْوَحِّد الْكِلْمِه
وْما يْعُود يِقْدِرْ جَيْش يِحْتَلُّو
ـ10ـ
.. وْآخْرِتْها شُو؟!
قْرِفْنَا الْحَكِي يَا ناسْ
قْرِفْنا الشِّربْ وِالْكاسْ
قْرِفْنا الْمَحَبِّه وِالزَّهرْ
قْرِفْنَا نْأَدِّنْ بِالْفَجْرْ
أَوْ نِحْضَر الْقدَّاسْ
قْرِفْنَا نْكَمِّلْ هَـ الْعُمرْ
الْخَالِي مْنِ الإِحْسَاسْ.
**

فخّار يكسّر فخّار
ـ1ـ
خَايِفْ مِنْ هَـ الْـ وِقْفُوا بْدَرْبِي
الْـ شَكُّوا صَابِيعُنْ بِعْيُونِي
الْـ سَكْبُولِي بْدِينَيِّي الْكِذْبِه
الْـ زَتُّونِي بْدِنْيِي مَجْنُونِه
النَّاس الْـ عَمْ بِيبِيعُوا حَالُنْ
لِلشَّيْطَان الْـ وِقْفِ قْبَالُنْ
عَارِي مِنْ وَرْقَات التِّينْ
تَا صَارُوا بْفَيَّات خْيَالُنْ
يِمْشُوا وْهِنِّي فِزْعَانِينْ!!
ـ2ـ
زْرَعْتِلُّنْ طُرْقَاتُنْ زَهْرْ
قَطْفُوا الزَّهْر وْضِحْكُوا عْلَيِّي
سْقِيتُنْ مِنْ قَلْفِيتِي خَمْرْ
شِرْبُوا الْخَمْر وْعِلْقُوا فِيِّي
شُو بَدِّي إِعْملْ يَا رَبِّي
مِلْكُوا الأَرْض.. مْلِكْت الْغُرْبِه
خَلِّصْنِي مِنْ ظلْمُنْ.. وَقِّفْ
عَ بْوَابِي مَارِدْ بِيخَوِّفْ
وِبْيَعْرِفْ أَسْرَار اللّعْبِه!!
ـ3ـ
أَرْقَامُنْ.. إِكْلِتْ أَرْقَامِي
وِحْسَابُنْ.. غَطَّى عَ حْسَابِي
وْطوْلِتْ بِعْيُونُنْ أَيَّامِي
دَقُّوا عَ أَوْتَار عْصَابِي
افْتَكْرُوا إِنُّو جْنُونِي قَرَّبْ
وْأَعْصَابِي مْنِ الدَّقّ بْتِتْعَبّْ
وْمَا عِرْفُوا وَقْت الْـ بِتْعَذَّبْ
بْيِتْجَدَّدْ عُمْرِي بِعْذَابِي!!
ـ4ـ
سَرْقُوا عَنْ طَاوِلْتِي الْخُبْزْ
وْتَرْكُوا طْفَالِي عَمْ بِتْصَرِّخْ
قَالُولِي: طَعْمِيهُنْ عِزّْ
تَا عِزَّكْ بِالْبَطْن يْفَرِّخْ
تَارِي الْـ مَا عِنْدُو أَطْفَالْ
عَمْ يِقْتُلْ تَا يْجَمِّعْ مَالْ
مَا بِيهِمُّو تِفْنَى عْيَالْ
بِيهِمُّو هَـ الْكَوْن يْدَوِّخْ!!
ـ5ـ
خَايِفْ مِنْ إِيدَيْهُنْ تِطْوَلْ
وِتْطَال الْغُرْبِه وْسِكَّانَا
خَايِفْ مِنْ إِجْرَامُنْ يُوصَلْ
وْيِقْضِي عَ مْحَبِّةْ إِنْسَانَا
خَايِفْ مِنْ إِشْيَا مَجْهُولِه
مِنْ نَاسْ بْتِخْلَقْ بِاللَّيْلْ
عْيُونُنْ مَفْتُوحَه وْمَسْطُولِه
وْعَ شْفَافُنْ صَرْخَات الْوَيْلْ
ـ6ـ
لَوْ فِيِّي إِخْلَقْ مِنْ حَالِي
عَالَـمْ.. يَعْرِفْ شُو اللِّي صَارْ
يِمْكِنْ كِنْت بْطَمِّنْ بَالِي
وْبِزْرَعْ خَلْف اللَّيْل نْهَارْ
لَكِنْ كِلُّنْ مِلْهِيِّينْ
وْعَمْ بِيمُوتُوا فِرْحَانِينْ
نِبَّهْتُنْ.. قَالُوا: مِسْكِينْ
فخَّار يْكَسِّرْ فخَّارْ!!
ـ7ـ
وَيْنُنْ؟!.. وَيْنُنْ؟!.. شُو اللِّي صَابُنْ
الْـ كَانِتْ أَمْجَادُنْ مضْوِيِّه
الأَرْض انْتَلْيِتْ مِنْ أَحْبَابُنْ
وْبَعْدَا عْقُولُنْ هِيِّي هِيِّي؟!
مَا عِرْفُوا الْمَاضِي مَا بْيِرْجَعْ
وِالْحَاضِرْ مُشْ مُمْكِنْ يِرْكَعْ
وْمَهْمَا رَكْضُوا.. مَوْتُنْ أَسْرَعْ
وْآخِرْتُنْ لِلشَّرّ هْدِيِّه؟!
ـ8ـ
وَيْنُنْ؟!.. وَيْنُنْ هَللِّي كَانُوا
تُوعَى الدِّنْيِي مِنْ كِلْمَاتُنْ
وِالْقَلْب الْـ ضَيَّعْ إِيمَانُو
يْلاقِي إِيمَانُو بْحَكْيَاتُنْ؟!
ضَاعُوا لِمِّنْ مَجْدُنْ ضَاعْ
وْصَارُوا السِّلْعَه الْـ عَمْ تِنْبَاعْ
وِبْيُوتُنْ لِلْغَيْر مْشَاعْ
وِالشَّوْك مْغَطَّى طرْقَاتُنْ
ـ9ـ
يَا شَعْبِي الْوَاقِفْ بِالْعَتْمِه
وِالنُّور بْقِنْدِيلَكْ حَامِلْ
نَاطِرْ حَتَّى تْقِلُّنْ كِلْمِه
تِضْوِي وْتِكْبَرْ قَدّ النِّجْمِه
أَوْ تِزْغَرْ وِتْصَفِّي مْشَاعِلْ
دَبْحُوكْ.. وْدَهْنُوا جَزْمَاتُنْ
بَاعُوكْ.. وْعَبُّوا خَزْنَاتُنْ
وْبَعْدَكْ عَمْ تِسْمَعْ حَكْيَاتُنْ
قَاتِلْهُنْ.. يَا شَعْبِي.. قَاتِلْ
ـ10ـ
يَا رَيْت بْتَعْرِف الِحْكَايِه
اللِّي حْرُوفَا انْكَتْبِتْ بِالدَّمّْ
الْـ بَعْدُنْ مَا حَطُّولا نْهَايِه
وْلا اسْتَحْيُوا مِنْ دَمْعِةْ أمّْ
وْلا مِنْ صَرْخِةْ طفْل زْغِيرْ
عَمْ يِشْحَدْ مِنْ كِتْر الْجُوعْ
وَاقِفْ عَ بْوَاب التِّعْتِيرْ
وْعَ خْدُودُو حَبَّات دْمُوعْ
وِبْقَلْبُو عَمْ يِغْلِي السَّمّْ
ـ11ـ
وْيَا رَيْت بْيِرْجَعْ مَاضِينَا
وِالتِّهْجِير يْصَفِّي ذِكْرَى
تْرَكْنَا مْحَارِمْنَا عَ الْمِينَا
بَرْكِي بْتِسْتَقْبِلْنَا بُكْرَا
تْرَكْنَاهَا بْيَارِقْ مَرْفُوعَه
تِحْكِي حْكَايِتْنَا بِدْمُوعَا
بَرْكِي الْحَقّ بْيِرْجَعْ يُوعَى
وِيْمَسِّحْ عَنْ وِجُّو الْغَبْرَه
ـ12ـ
وِصْلُوا عْلَيْك.. وْوِصْلُوا عْلَيِّي
وْمَا بْتِفْرُقْ لَوْلا اغْتَالُونِي
مَا دَامَكْ رَحْ تِبْقَى فِيِّي
الْقَلْب.. الرُّوحْ.. وْضَوّ عْيُونِي
حْكِيتِلَّكْ كِلْمِه بِالسَّابِقْ
شِفْتَكْ فَوْق الْكِلْمِه مَارِقْ
وِمْغَطَّى عْيُونَكْ.. وِالسَّارِقْ
عَمْ يِسْرُقْ مِنْ بَيْت الْمُونِه!!
ـ13ـ
فَبْرِكْ مِنْ ضَافِيرَكْ خَنْجَرْ
شِكُّوا بْصَدْرُنْ لا تِتْأَخَّرْ
إِيدَيْهُنْ خَنْقِتْ أَنْفَاسَكْ
وْإِجْرَامُنْ عَمْ يِقْوَى أَكْتَرْ
سَاعِدْنِي وَحِّدْ قِدَّاسَكْ
مَعْ تأْدِينَكْ.. حَتَّى يِكْبَرْ
جِسْمَكْ.. وِيْخَافُوا مْنِ قْيَاسَكْ
قِدَّام الْمَارِدْ يَا شَعْبِي
عَ طُول الْحُكَّامْ بْتِزْغَرْ.
**
كلّن متّفقين
ـ1ـ
كلُّنْ.. كلُّنْ مِتِّفْقِينْ
بِالْيَسَار وْبِالْيَمِينْ
يِتْسَلُّوا بْأَرْوَاح النَّاسْ
وْيِقْضُوا عَ الشَّعْب الْمسْكِينْ
ـ2ـ
أُوعَا.. اُوعَا شُو ما صَارْ
تِمْشِي مَعْ زمْرِةْ تَتَارْ
لازِمْ نِحْرِقْهَا بِالنَّارْ
بْقَلب مْحَجَّرْ ما بِيلِينْ
ـ3ـ
فَتِّحْ عَيْنَكْ حَتَّى تْشُوفْ
الإِشْيَا كِلاَّ عَ الْمَكْشُوفْ
نِحْنَا مْنَاكُلْ ضَرْب سْيُوفْ
وْهِنِّي بْقَصْرُنْ فِرْحَانِينْ
ـ4ـ
مِسْلِمْ.. نِصْرَانِي.. ما هَمّْ
إِنْتَ عِنْدَكْ بَيّ وْأمّْ
إِنْتَ بِشْرَايِينَكْ دَمّْْ
مُلْكَكْ.. مُشْ مُلْك شِيَاطِينْ
ـ5ـ
لا تِتْكَتَّفْ قِدَّامِي
وْتِتْلَهَّى بْمَرْكَزْ سَامِي
بْبَيْتَكْ مَوْجُود حْرَامِي
عَمْ يِسْرُقْ بِـ إِسْم الدِّينْ
ـ6ـ
لا تْقِلِّي: شَاعِرْ مَغْرُورْ
طَالِب شُهْرَه وْمَجْد قْصُورْ
عَمْ بِكْتُبْ تَا شَعْبِي يْثُورْ
وْيِدْبَحْ بِـ ضِفْرُو مْجَانِينْ